El Seya y el Nalón xúnense en Blimea na Casona del Bravial

El próximu xueves 18 d’ochobre a les 7 la tarde la Casona del Bravial de Blimea recibe a Titu Manzano, presidente de l’asociación Amigos de Parres, que va ufiertar una charra na que se van tratar cuestiones rellacionaes col hermanamientu de los ríos Seya y Nalón, la cultura, el deporte y l’asociacionismu.

Justo Manzano, “Titu”, nació en L’Entregu en 1951 y foi’l primer maestru d’asturianu del oriente. En 1985 incorporóse al Colexu Ríu Seya onde dio clases hasta la so xubilación. Amás, foi secretariu del comité organizador del Descensu Internacional del Seya durante la presidencia d’Emilio Llamedo y presidió la xunta xestora dempués del so fallecimientu. Nestos momentos sigue siendo’l secretariu, y ye amás el presidente de l’asociación Amigos de Parres dende la so fundación, nel añu 1990, secretariu de la coral “Cima” del mesmu conceyu y miembru de “Llangreanos nel mundu”, destacando asina pola so intensa actividá asociativa.

Esta charra ta enmarcada dientro de los actos d’hermanamientu de los ríos Seya y Nalón que se vienen desendolcando dende’l pasáu mes de xunetu, y que se concretó’l pasáu 3 d’agostu col vertíu simbólicu de les agües del Nalón nel Seya nun actu que se celebró nel conceyu de Parres con representación municipal de Samartín.

La charra ta abierta a toes aquelles persones que tean interesaes, d’un mou especial a los miembros de les munches asociaciones que trabayen por fomentar la cultura y el deporte nel conceyu de Samartín. Amás, hasta’l vienres 19 d’ochobre pue visitase tamién na Casona del Bravial una esposición de semeyes sobre’l Descensu Internacional del Seya.

Deja un comentario

Tu dirección de correo electrónico no será publicada. Los campos obligatorios están marcados con *